WAZIRI NDUMBARO ATEMBELEA ENEO LITAKALOJENGWA UWANJA WA MPIRA WA KISASA ARUSHA, RC MONGELA AMKABIDHI HATI

 Na Joseph Ngilisho, ARUSHA

Waziri wa Utamaduni, Sanaa na Michezo Mhe. Dkt. Damas Ndumbaro ametembelea na kukagua eneo la Olmoth ambalo litajengwa uwanja mpya wa mpira wa miguu wenye uwezo wa kuchukua watazamaji Elfu thelathini utakaotumika katika michuano ya AFCON 2027.

 Mhe. Dkt. Damas Ndumbaro amekagua eneo hilo leo Desemba 15, 2023 Jijini Arusha sambamba na kupokea hati ya eneo hilo lenye ukubwa wa hekari 49 iliyotolewa na Mkuu wa Mkoa wa Arusha, Mhe. John Mongella ambaye amebainisha kuwa hati ya sehemu ya eneo lililobaki itakabidhiwa kwa Wizara kabla ya mwezi Machi, 2024.  

Akizungumza mara baada ya kupokea hati hiyo Waziri wa Utamaduni, Sanaa na Michezo Mhe. Dkt. Damas Ndumbaro ameeleza kuwa Wizara inatarajia kumkabidhi mkandarasi eneo la mradi mwezi Januari, 2024 ili kazi ya ujenzi wa uwanja huo ianze Mara moja.