MKURUGENZI JIJI LA ARUSHA HATAKI UTANI ,APANGA KUPIGA MNADA MADUKA YA WAFANYABIASHARA WASIOTAKA KULIPA KODI MPYA KUPITIA MFUMO WA TAUSI, ATENGA MAMILIONI KUHAMISHA MAKABURI ARUSHA

Na Joseph Ngilisho Arusha 

HALMASHAURI ya jiji la Arusha imetishia kuwaondoa kwa mabavu wafanyabiashara wa maduka wasiotaka  kuingia mkataba mpya wa upangaji kupitia mfumo mpya wa kukusanya mapato ya serikali wa TAUSI .

Akiongea na waandishi wa Habari baada ya kutembelea  maduka ya wafanyabiashara katika eneo la standi ndogo,Mkurugenzi wa jiji hilo,Mhandisi Juma Hamsini alisema halmashauri hiyo imejipanga kupiga mnada maduka yake ambayo wapangaji wake hawatakuwa tayari kujaza mkataba mpya na kujisajili kupitia mfumo huo wa Tausi.

Alisema jiji la Arusha limepandisha kodi kwenye maduka yake tangu Julai mwaka huu kutoka sh,200,000 hadi 250,000 lakini baadhi ya wafanyabiashara wanaojiita wajenzi wanaendesha kampeni ya kugomea ongezeko hilo la kodi ikiwemo kukataa kujisajili katika mfumo Tausi kwa madai kwamba wao ni wajenzi.

 

                                      

 "Nimetoa nafasi hadi jumamosi  wafanyabiashara wawe wamejaza mikataba mipya na kulipa tozo mbalimbali ila baada ya jumamosi tunatangaza mnada kwa maduka;ambayo hayatakuwa yamejisajili kupitia mfumo wa serikali wa Tausi"

Wafanyabiashara wakiendelea kujaza fomu ya mkataba mpya wa upangaji katika kambi ya wataalamu wa jiji standi ndogo ARUSHA. 

Alisema baada ya kutembelea maduka hayo ikiwa ni utaratibu wake wa kila wiki mara mbili ,Hamsini alisema amebaini kwamba baadhi ya wafanyabiashara wanaendesha biashara zao bila leseni,na wengine wanaendesha maduka mawili kwa kutumia leseni moja na wengine wamepangishwa na wajenzi kwa sh 500,000 huku halmashauri ikiambulia laki mbili tu.

"Tumegundua kuna baadhi ya wafanyabiashara wamepangishwa kwenye maduka yetu na watu wanaojiita wajenzi kwa sh 500,000 wakati halmashauri inalipwa 200,000 na wengine wanatumia leseni moja kiendesha maduka mawili na wengine hawana leseni kabisa" 

Alisema wataalamu wa jiji wamejipanga kwa kuweka kambi katika eneo la maduka  ili kuwasajiri wafanyabiashara kupitia mfumo wa TAUSI na wale wasiotaka kujisajiri na kulipa kodi mpya maduka yao yatapigwa mnada ili kuwapa watu wengine ambao wapo tayari kuingia mkataba na jiji hilo.

Hata hivyo mhandisi Hamsini  alishindwa kujizuia baada ya kuamua kuwachapa noti kama sehemu ya  kuhamasisha na kuwashukuru wafanyabiashara waliokutwa na leseni hai,waliojaza fomu za mkataba mpya na wale waliojisajili  kupitia mfumo mpya wa serikali wa TAUSI.

Katika hatua nyingine Mkurugenzi huyo alidai kwamba jiji hilo limetenga kiasi cha shilingi milioni 300 kwa ajili ya kujenga uwekezaji wa maduka katika eneo la Themi ili baadhi ya wafanyabiashara waende huko .

Aidha alisema halmashauri hiyo ipo katika hatua ya kuwalipa fidia ndugu wa marehemu ili kuhamisha makaburi yaliyopo katikati ya jiji na eneo hilo kutumika kwa ajili ya miradi ya biashara.

Naye naibu meya wa jiji la Arusha Abrahamu Mollel alisema  kumekuwepo na wimbi la madalali wanaowapangisha wafanyabiashara kwenye maduka ya halmashauri kwa bei ya juu  huku halmashauri ililipwa kiasi kidogo cha sh, 200,000 kuwa hali hiyo haikubaliki na kutoa onyo kali kwa madalali hao kuwachukua hatua.

Ends........