BY NGILISHO NEWS
Aliyekuwa mbunge wa Mtambile kupitia Chama cha Wananchi (Cuf), Masoud Abdallah Salim amefariki dunia leo Julai 25, 2022 katika hospitali ya rufaa ya mkoa iliyopo Pemba, Zanzibar.
Taarifa za kifo cha mwanasiasa huyo zimethibitishwa na Katibu wa Uenezi na Mawasiliano kwa Umma wa ACT Wazalendo, Salim Bimani.
Bimani ameeleza kwamba Salim alikuwa mbunge kati ya mwaka 2015 – 2020, amefariki leo asubuhi kutokana na maradhi ya moyo na kwamba mazishi yake yanatarajiwa kufanyika nyumbani kwake Mtambile, saa 10 jioni.
“Sisi ACT Wazalendo tunatoa mkono wa pole kwa familia na wananchi wote wa Tanzania kwa kuondokewa na mpendwa wao,” amesema Bimani.
Hadi anafikwa na umauti, Salim alikuwa msemaji wa kisekta wa ACT Wazalendo katika Wizara ya Ulinzi na Jeshi la Kujenga Taifa.
Salim amekuwa mbunge wa Mtambile kupitia CUF kuanzia mwaka 2003 – 2020 na katika Bunge lililopita alikuwa mjumbe wa kamati ya ulinzi na usalama kabla ya kuhamia ACT Wazalendo mwaka 2020 kumfuata Maalim Seif Sharif Hamad ambaye alivuliwa uanachama wa CUF na kwenda ACT Wazalendo.
0 Comments